Franskir dagar - Jul 2017, Page 22
22
Þann 8. apríl sl. voru liðin 120 ár frá fæð-
ingu Einars Sigurðssonar, heiðursborgara
Fáskrúðsfjarðar og verður hans minnst
í kaffisamsæti í Félagsheimilinu Skrúði
þann 29. júlí 2017 frá kl. 14 – 17.
Einar Sigurðsson fæddist 8. apríl í
Baldurshaga á Fáskrúðsfirði. Hann ólst upp
við smíðar frá blautu barnsbeini en faðir
hans, Sigurður Einarsson var sjálfmenntaður
smiður á tré og járn auk þess að stunda
búskap og sjósókn. Einar hélt til Reykjavíkur
um tvítugt, lærði húsasmíði í Trésmiðjunni
Völundi og lauk meistaraprófi í húsasmíði.
Hann var síðan um tíma í Sandnesi í Noregi
til að afla sér frekari þekkingar í smíði.
Síðar lærði Einar skipateikningar í Reykjavík
og hlaut meistararéttindi í skipasmíði.
Einar settist að á Fáskrúðsfirði og vann við
trésmíðar en faðir hans hafði byggt upp
verkstæði og sjóhús við Odda. Árið 1932
stofnaði Einar, ásamt Benedikt Sveinssyni,
Trésmíðaverksmiðju Austurlands. Fyrir-
tækið var í daglegu tali kallað Odda-
verkstæðið. Einar tók brátt einn við rekstr-
inum og með árunum jukust umsvif
fyrirtækisins.
Á verkstæðinu var jafnframt stunduð vél- og
járnsmíði, vélaviðgerðir og niðursetningar
véla sem Andrés bróðir Einars sá um en
hann var járnsmíðameistari.
Guðlaugur bróðir Einars lærði húsasmíði í
Reykjavík og eftir að hann fluttist heim hóf
hann störf á Oddaverkstæðinu og var löng
samvinna þeirra bræðra náin og góð.
Alls smíðaði Einar um 100 opna báta, tugi
árabáta og um 20 þilfarsbáta. Smíði bátanna
var fyrst og fremst eftir hans eigin teikningum
og hugmyndum. Auk bátasmíðinnar reisti
Einar fjölda íbúðarhúsa, opinberar bygg-
ingar, sinnti brúar- og bryggjusmíði og voru
oft mörg verkefni í gangi í einu. Einnig gerði
hann við og endurbyggði marga báta. Hann
lét til sín taka ef verkefnin gengu ekki eins
og hann óskaði.
Einar hafði alltaf sjálfur yfirumsjón með
öllum verkum. Hjá honum unnu margir
menn hverju sinni og voru hverjum og
einum falin þau verkefni sem best hæfðu
viðkomandi.
Einar Sigurðsson